जनकपुरधाम । मिथिला पहिरन, कला तथा संस्कृतिको प्रवर्द्धन गर्ने उद्देश्यले जनकपुरधाममा आयोजना हुन लागेको ‘मिथिला भाइवज फेसन शो’ कार्यक्रम विवादमा तानिएको छ। कार्यक्रमका केही सहभागी युवतीहरूले आयोजक संस्था अशु एण्ड नेहा प्रोडक्सन हाउसका प्रमुख कार्यकारी अधिकृत (CEO) लभा चौधरीमाथि अनुचित व्यवहार गरेको आरोप लगाएका छन्।
सहभागी युवतीहरूको आरोप अनुसार चौधरीले व्यक्तिगत सन्देश पठाउने, पटक–पटक फोन सम्पर्क गर्ने तथा आपत्तिजनक प्रकृतिका संवाद गर्ने गरेका छन्। केही युवतीहरूलाई उनले प्रेम प्रस्ताव राख्ने तथा विभिन्न प्रकारका दबाब सिर्जना गर्ने प्रयास गरेको समेत दाबी गरेका छन्।
यस्तै, केही सहभागीहरूले कम उमेरका किशोरीहरूसँग समेत अनुचित प्रकारका सन्देश आदानप्रदान भएको आरोप लगाएका छन्। उनीहरूको भनाइमा यस्ता गतिविधिका आरोपहरूले मिथिला कला, संस्कृति र परम्पराको संरक्षण तथा प्रवर्द्धन गर्ने उद्देश्यले आयोजना गरिएको कार्यक्रमको छविमा नकारात्मक असर पार्न सक्ने अवस्था सिर्जना गरेको छ।
“मिथिलाको पहिचान, संस्कृति र प्रतिभालाई अन्तर्राष्ट्रिय स्तरसम्म पुर्याउने उद्देश्यले आयोजना गरिएको कार्यक्रममा यस्ता आरोपहरू सार्वजनिक हुनु दुःखद् विषय हो,” एक सहभागीले नाम नखुलाउने सर्तमा बताइन्।
यता, आरोपबारे प्रतिक्रिया लिन अशु एण्ड नेहा प्रोडक्सन हाउसका CEO लभा चौधरीसँग सम्पर्क गर्न खोजिए पनि समाचार तयार पार्दासम्म उनको फोन सम्पर्कमा आउन सकेन। त्यसैले उनीमाथि लगाइएका आरोपहरूको स्वतन्त्र पुष्टि हुन सकेको छैन।
यस घटनापछि मिथिला भाइवज फेसन शोको तयारी र व्यवस्थापनमाथि प्रश्न उठ्न थालेका छन्। सहभागी र आयोजक पक्षबीच देखिएको विवादले कार्यक्रमको विश्वसनीयता तथा जनकपुरधाममा हुने सांस्कृतिक कार्यक्रमहरूको छविमा समेत असर पार्न सक्ने सरोकारवालाहरूको भनाइ छ।
यद्यपि, आरोपहरूको सत्यता सम्बन्धित निकायको अनुसन्धान तथा दुवै पक्षको आधिकारिक धारणा सार्वजनिक भएपछि मात्रै स्पष्ट हुने देखिन्छ। यसबीच आयोजक पक्षले घटनाबारे स्पष्ट धारणा सार्वजनिक गरी उठेका प्रश्नहरूको जवाफ दिनुपर्ने माग समेत बढ्न थालेको छ।
यो खबर पढेर तपाईलाई कस्तो महसुस भयो ?
