जनकपुरधाम,३० कार्तिक । विवाहपञ्चमी महोत्सवलाई भव्य बनाउने उद्देश्यले जनकपुरधामबाट विश्व हिन्दु परिषद् (विहिप) का पदाधिकारीहरू तिलक र आमन्त्रण पत्रसहित अयोध्या जान तयारीमा छन्। भगवान श्रीराम र माता सीताको विवाहलाई केन्द्रमा राखेर विशेष कार्यक्रम आयोजना गर्न, ५ सय सदस्यीय टोली तिलक लिएर अयोध्या प्रस्थान गर्नेछ।
विश्व हिन्दु परिषद् धनुषाका अध्यक्ष सन्तोष साहका अनुसार, टोलीलाई मधेस प्रदेशका मुख्यमन्त्री सतिश सिंहले विशेष समारोहबीच विदाई गर्नेछन्। मुख्यमन्त्री सिंह स्वयं मंसिर २ गते वीरगञ्जमा टोलीमा सहभागी भई अयोध्या जाने कार्यक्रम रहेको छ। तिलक टोली २ गते नै अयोध्या पुग्नेछ र ३ गते जानकी मन्दिरको तर्फबाट तिलक र आमन्त्रण पत्र विहिपका महासचिव राजेन्द्र सिंह पंकजको नेतृत्वमा चम्पत रायलाई हस्तान्तरण गरिनेछ।
यसै अवसरमा, विहिपको सक्रियतामा यस वर्ष पनि सामूहिक विवाह कार्यक्रमको आयोजना गरिएको छ। विवाहपञ्चमी महोत्सवले धार्मिक, सांस्कृतिक र ऐतिहासिक महत्वलाई उजागर गर्दै जनकपुर र अयोध्याबीचको सांस्कृतिक सम्बन्धलाई अझ सुदृढ गर्ने विश्वास लिइएको छ।
विवाहपञ्चमी महोत्सव प्रत्येक वर्ष जनकपुरमा भव्य रूपमा मनाइन्छ। यस पटकको महोत्सवले जनकपुर र अयोध्याबीचको ऐतिहासिक सम्बन्धलाई अझै प्रगाढ बनाउने अपेक्षा गरिएको छ।
यो खबर पढेर तपाईलाई कस्तो महसुस भयो ?
