बीरगन्ज,१३ मंसिर । बाराको रामराजा बहुमुखी क्याम्पसका प्रमुख हरिभूषण कुशवाहाको हत्या प्रकरणमा पाँच महिनादेखि फरार रहेका मुख्य अभियुक्त सुरेन्द्र कुशवाहालाई बारा प्रहरीले पक्राउ गरेको छ। बारा प्रहरीका प्रवक्ता प्रकाश सापकोटाका अनुसार, विशेष टोलीले विराटनगरबाट अभियुक्तलाई पक्राउ गर्न सफल भएको हो।
गत जेठ ३२ गते आदर्श कोतवाल नगरपालिका–२ स्थित आफ्नै घरबाट फर्किने क्रममा क्याम्पस प्रमुख कुशवाहामाथि गोली प्रहार गरिएको थियो। घाइते कुशवाहाको उपचारको क्रममा सोही दिन मृत्यु भएको थियो।
घटनाको क्रममा क्याम्पस प्रमुख कुशवाहाले मृत्यु नजिकै रहँदा भिडिओ रेकर्ड गराउँदै आफूमाथि गाउँकै सुरेन्द्र कुशवाहाले व्यक्तिगत रिसिबीका कारण गोली प्रहार गरेको बताएका थिए। यही मृत्युकालीन बयान प्रहरी अनुसन्धानको मुख्य आधार बनेको थियो।
प्रहरीका अनुसार, सुरेन्द्र कुशवाहा हत्या प्रकरणपछि फरार रहँदै विराटनगरमा लुकी–छिपी बसिरहेका थिए। उनी त्यहाँ खेतीपाती सुरु गरेर सामान्य जीवनयापन गरिरहेका थिए। प्रहरीले प्रविधिको सहयोग र गोप्य सूचनाका आधारमा उनलाई पछ्याउँदै बुधबार पक्राउ गरेको हो।
विशेष टोलीले पाँच महिनाको प्रयासपछि अभियुक्तलाई नियन्त्रणमा लिन सफल भएको हो। प्रहरी प्रवक्ता सापकोटाले सुरेन्द्र कुशवाहालाई बिहीबार बिहान ९ बजे पत्रकार सम्मेलनमार्फत सार्वजनिक गरिने जानकारी दिए।
घटनाको दिन गोली लागेपछि क्याम्पस प्रमुख कुशवाहाले सर्वसाधारणलाई भिडिओ रेकर्ड गर्न भनेका थिए। उक्त भिडिओमा उनले सुरेन्द्र कुशवाहाको नाम उल्लेख गर्दै हत्या प्रयासका पछाडिको कारण व्यक्तिगत रिसिबी भएको बताएका थिए। मृत्युकालीन उक्त बयानले प्रहरीले अभियुक्त पहिचान गर्न महत्वपूर्ण मद्दत पुर्याएको थियो।
पक्राउ परेका सुरेन्द्र कुशवाहा पूर्व सैनिक जवान रहेको तथ्य पनि सार्वजनिक भएको छ। प्रहरीको अनुसन्धानका क्रममा अभियुक्तले आफ्नो अपराध लुकाउन विभिन्न ठाउँमा लुकेर बस्ने गरेको र विराटनगरमा स्थायीत्वका लागि खेतीपाती सुरु गरेको पत्ता लागेको हो।
पाँच महिनादेखि जारी व्यापक खोजबिन र विशेष टोलीको परिचालनपछि प्रहरीले हत्या प्रकरणका मुख्य अभियुक्त पक्राउ गर्न सफल भएको हो। प्रहरीले अब अभियुक्तसँग थप अनुसन्धान गरी अन्य संलग्नको पहिचान र हत्याको विस्तृत कारण सार्वजनिक गर्ने जनाएको छ।
रामराजा क्याम्पस प्रमुखको हत्या र यसका पछाडि रहेको व्यक्तिगत रिसिबीले स्थानीय तहमा सुरक्षा व्यवस्थापनबारे गम्भीर प्रश्न खडा गरेको छ। घटनाले शैक्षिक संस्थाका प्रमुखहरूको सुरक्षाका लागि थप सतर्कता आवश्यक रहेको देखाएको छ।
प्रहरीले दोषीलाई कानूनी कारबाहीमार्फत न्याय दिलाउने प्रतिबद्धता जनाएको छ। यो पक्राउले पीडित परिवार र समुदायमा केही राहत दिने अपेक्षा गरिएको छ।
यो खबर पढेर तपाईलाई कस्तो महसुस भयो ?
