जनकपुरधाम फाल्गुन ४ ।विगत १४-१५ वर्षदेखि वैदेशिक रोजगारीको सिलसिलामा कतारमा रहनुभएका महोत्तरी, मनरा सिस्वा नगरपालिका वडा नं. ६, सरपल्लोका शंकर महतोले आफ्नो मेहेनतको कमाइबाट सामाजिक सेवामा हात बढाउनुभएको छ। गनेसी महतोका सुपुत्र शंकर महतोको विशेष इच्छा र सहयोगमा उहाँको परिवारले जनकपुरका अनाथ तथा वृद्ध आश्रममा पुगी विभिन्न सामग्रीहरू हस्तान्तरण गरेको हो।
शंकर महतोकी श्रीमती सविता महतो र छोरा अनिकेत महतोले आश्रममै पुगेर त्यहाँ रहेका आश्रितहरूलाई सहयोग सामग्री प्रदान गर्नुभएको छ।
के-के गरियो सहयोग?
वृद्ध आश्रममा: आश्रममा रहेका आमाहरूका लागि (साडी) र फलफूल वितरण गरिएको छ।
अनाथ आश्रममा: त्यहाँ रहेका बालबालिकाहरूको पठनपाठनमा सहज होस् भन्ने हेतुले शैक्षिक सामग्रीहरू (कापी, पेन्सिल, कटर, इरेजर) का साथै फलफूल प्रदान गरिएको छ।
लामो समयदेखि बिदेशमा रहेर पनि आफ्नो गाउँ-ठाउँ र समाजप्रतिको जिम्मेवारी सम्झिँदै महतो परिवारले गरेको यो कार्यको स्थानीय स्तरमा प्रशंसा भइरहेको छ। निस्वार्थ व्यक्तिगत खुसी र सेवा भावले गरिएको यो सानो सहयोगले आश्रममा रहेका वृद्धवृद्धा र बालबालिकाहरूको मुहारमा मुस्कान ल्याएको छ।
परिवारका अनुसार, सामाजिक कार्यमा सहभागी हुन पाउँदा आफूहरूलाई आत्मसन्तुष्टि मिलेको र आगामी दिनमा पनि यस्ता कार्यलाई निरन्तरता दिने इच्छा रहेको छ।
यो खबर पढेर तपाईलाई कस्तो महसुस भयो ?
