काठमाडाैं। प्रधानमन्त्रीको अध्यक्षतामा आज अपराह्न मन्त्रिपरिषद्को बैठक बस्ने भएको छ। प्रधानमन्त्री तथा मन्त्रिपरिषद्को कार्यालय, सिंहदरबारमा ठिक ३ बजेका लागि बैठक आह्वान गरिएको छ।
आजको बैठकमा सरकारका नीतिगत प्राथमिकता, प्रशासनिक नियुक्तिहरू र मुलुकको पछिल्लो राजनीतिक घटनाक्रमका विषयमा महत्त्वपूर्ण छलफल हुने बुझिएको छ।
बैठकमा विभिन्न मन्त्रालयबाट प्राप्त भएका प्रस्तावहरूमाथि छलफल गरी निर्णय लिइने कार्यसूची रहेको छ। विशेषगरी, आगामी आर्थिक वर्षको बजेट निर्माणको पूर्वसन्ध्यामा सरकारले केही महत्त्वपूर्ण आर्थिक प्याकेज र विकास आयोजनाहरूका बारेमा समेत छलफल गर्न सक्ने सम्भावना छ।
यसका साथै, कर्मचारी प्रशासनका केही रिक्त पदहरूको पदपूर्ति र केही उच्चपदस्थ अधिकारीहरूको जिम्मेवारी हेरफेरका विषयमा पनि मन्त्रिपरिषद्ले निर्णय लिन सक्ने प्रधानमन्त्री कार्यालय स्रोतले जनाएको छ।
संवैधानिक परिषद् सम्बन्धी पछिल्लो अध्यादेश जारी भएसँगै उत्पन्न राजनीतिक परिस्थिति र संसद्को आगामी अधिवेशनका तयारीका विषयमा पनि मन्त्रीहरूबीच अनौपचारिक छलफल हुने बताइएको छ।
प्रधानमन्त्रीले सरकारको कार्यसम्पादनलाई थप प्रभावकारी बनाउन मन्त्रीहरूलाई आवश्यक निर्देशन दिने समेत अपेक्षा गरिएको छ।
यो खबर पढेर तपाईलाई कस्तो महसुस भयो ?
