जनकपुरधाम०८१ वैशाख २१–  भारतको केन्द्रीय रिजर्भ पुलिस बल (CRPF) ले जवान मुनिर अहमदलाई सेवा नियम उल्लंघन र राष्ट्रिय सुरक्षामा खतरा पुर्‍याएको भन्दै जागिरबाट बर्खास्त गरेको छ।

मुनिरले पाकिस्तानको सियालकोट निवासी मीनल खानसँग विवाह गरेका थिए। मीनल सन् 2025 को मार्च महिनामा छोटो अवधिको भिसामा भारत आएकी थिइन्। भिसा सकिएपछि पनि भारतमै बसेको आरोप लगाउँदै उनलाई अवैध रूपमा राखिएको भनिएको छ। मीनलले दीर्घकालीन भिसाका लागि आवेदन दिएकी छिन्, जुन हाल गृह मन्त्रालयमा विचाराधीन अवस्थामा छ।

भारत सरकारले अप्रिल 22 मा पहलगाममा भएको आतंकवादी आक्रमणपछि सबै पाकिस्तानी नागरिकका भिसा निलम्बन गरेको थियो। यसै अनुसार मीनललाई देश छोड्न सूचना दिइएको हो। तर मुनिरले श्रीमतीलाई निर्वासनबाट रोक्न जम्मुस्थित भालवाल अदालतमा अपिल गरेका थिए, जसपश्चात् तत्कालीन रूपमा उनलाई देश निकाला गरिएको थिएन।

तर मिडियामा विषय आउनासाथ CRPF ले मुनिरलाई जागिरबाट हटाएको हो। CRPF का अनुसार, मुनिरले सेवा आचरण उल्लंघन गर्दै भिसा नियमको अवहेलना गरेका थिए, जसले राष्ट्रिय सुरक्षामा प्रश्न उठाएको बताइएको छ।

मीनल खानले आफूहरू निर्दोष रहेको र आतंकवादसँग कुनै सम्बन्ध नरहेको दाबी गरेकी छन्। उनले प्रधानमन्त्री नरेन्द्र मोदीलाई न्यायका लागि अपिल गर्दै भनेकी छन् कि भिसा समयमै नवीकरणका लागि आवेदन दिइएको थियो, तर अब श्रीमान्-श्रीमती अलग पारिँदै छ, जुन अमानवीय कार्य हो।