१५ चैत — शनिबार पक्राउ परेका पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई आज काठमाडौँ जिल्ला अदालतमा उपस्थित गराइँदै छ। सार्वजनिक बिदा परेकाले शनिबार अदालत बन्द रहेकाले उनीहरूलाई आज मात्रै म्याद थपका लागि अदालत लैजान लागिएको हो।

 

गत भदौ महिनामा भएको जेनजी आन्दोलनका क्रममा भएका हिंसात्मक घटनाबारे छानबिन गर्न गठन गरिएको गौरीबहादुर कार्की नेतृत्वको जाँचबुझ आयोगले कारबाहीका लागि सिफारिस गरेपछि प्रहरीले शनिबार उनीहरूलाई पक्राउ गरेको हो। प्रहरी टोलीले ओलीलाई भक्तपुरको गुण्डुस्थित निजी निवासबाट र लेखकलाई भक्तपुरकै कटुन्जेबाट नियन्त्रणमा लिएको थियो।

 

आज अदालतले अनुसन्धानका लागि उनीहरूलाई कति दिन हिरासतमा राख्न अनुमति दिन्छ भन्ने विषयलाई निकै चासोका साथ हेरिएको छ। दुवै नेतालाई हाल प्रहरीको कडा सुरक्षा घेरामा राखिएको जनाइएको छ।