काठमाडौँ — बालेन्द्र शाह नेतृत्वको सरकारले राजदूत नियुक्ति प्रक्रियामा ठूलो परिवर्तन गर्ने तयारी गरेको छ। विगतमा राजनीतिक सिफारिस र मन्त्रालयभित्रका अधिकारीहरूबाट नियुक्त हुने परम्परा तोड्दै अब राजदूत खुला प्रतिस्पर्धाबाट चयन गर्ने योजना अघि बढाइएको हो।

परराष्ट्र मन्त्रालयका अनुसार, राजदूत नियुक्तिका लागि सार्वजनिक रूपमा विज्ञापन खुलाइनेछ। त्यसपछि आवेदन दिएका उम्मेदवारहरूबीच प्रतिस्पर्धा गराइ योग्य र सक्षम व्यक्तिलाई छनोट गरिनेछ। यसले कूटनीतिक पदमा दक्षता र पारदर्शिता बढ्ने अपेक्षा गरिएको छ।

हाल भारत, चीन, अमेरिका, बेलायत लगायतका प्रमुख मुलुकसहित १७ राजदूत पद रिक्त छन्। आगामी जुलाई अन्त्यसम्म ब्राजिल, बहराइन, बंगलादेश, म्यानमार, अष्ट्रिया, ओमान र इजिप्टमा रहेका राजदूतहरूको कार्यकाल सकिएपछि थप पदहरू पनि खाली हुनेछन्।

सरकारले एकैपटक करिब २४ राजदूत खुला प्रतिस्पर्धामार्फत नियुक्त गर्ने तयारी गरेको बताइएको छ। नयाँ व्यवस्था कार्यान्वयनमा आएपछि राजदूत नियुक्ति प्रक्रिया अझ पारदर्शी र प्रतिस्पर्धामूलक बन्ने विश्वास गरिएको छ।