चितवन,२ असार । रेल मार्गको सर्भे गर्न भन्दै आएको टोली चढेको गाडीमा स्थानीयले आगजनी गरेका छन् । रेल मार्गको सर्भे गर्न चितवन आएको टोलीको गाडीमा बुधबार स्थानीयहरूले आगजनी गरेका हुन् ।
भरतपुर महानगरपालिका–७ कृष्णपुर पुगेको टोली चढेको गाडी नियन्त्रणमा लिएर आगजनी गरेको प्रहरीले जनाएको छ । रेल मार्गको सर्भेका लागि सो स्थानमा पुगेको आरएच कन्सल्टेन्सीको बागमती प्रदेश ०१–०३० च ७१९० नम्बरको गाडीमा आगजनी गरेको जिल्ला प्रहरी कार्यालय चितवनले जनाएको छ ।
प्रहरीका अनुसार पूर्वपश्चिम रेल मार्ग निर्माण गर्नका लागि हेटौंडाबाट बर्दघाटसम्म अध्ययन कार्य भइरहेको र सो कार्यका लागि कन्सल्टेन्सीको टोली उक्त स्थान पुगेको थियो । त्यसअघि भरतपुर–८ मा सर्भेको काम गरिएको थियो । भरतपुर–८ सकेर बुधबार बिहान वडा नम्बर–७ कृष्णपुरमा पुग्दा स्थानीयलेटाेलीलाई नियन्त्रणमा लिएका थिए ।
बस्तीबाट रेल मार्ग लान नपाइने भन्दै स्थानीयले विरोध जनाएका थिए । घना बस्ती भएको ठाउँबाट रेल मार्ग बनाउन उचित नहुने उनीहरूको तर्क रहेको छ । बस्तीलाई उजाड बनाएर रेल मार्ग लैजान नदिने र अहिले गरिएको सर्भे नै परिवर्तन गर्नुपर्ने उनीहरूको माग छ ।
यो खबर पढेर तपाईलाई कस्तो महसुस भयो ?
