सनोज यादब ,जनकपुरधाम, साउन ५ – आज साउन महिनाको पहिलो सोमबार, हिन्दू धर्मावलम्बीहरूका लागि विशेष धार्मिक महत्त्व राख्ने दिन, देशभरका शिवालयहरूमा श्रद्धालु भक्तजनहरूको घुइँचो लागेको छ। बिहानैदेखि पशुपतिनाथ लगायत देशभरका शिव मन्दिरहरूमा भक्तजनहरूको लामबद्ध उपस्थिति देखिएको छ।

 

श्रावण महिनालाई भगवान् शिवको विशेष महिना मानिन्छ भने सोमबारलाई शिवजीको प्रिय वारका रूपमा पूजा गरिन्छ। आजको दिन विशेषगरी श्रद्धालुहरू व्रत बसी शिवलिङ्गमा जल, दुध, गङ्गाजल चढाउँदै बेलपत्र अर्पण गर्ने, मन्त्र जप र आराधना गर्ने परम्परा निभाइन्छ।

 

विशेषतः महिलाहरू हरियो लुगा, चुरा र मेहन्दी लगाएर शिव पूजा गर्ने परम्परा अनुसार जनकपुरधामको शिवचोकस्थित शिव मन्दिरमा आज बिहानैदेखि हजारौं श्रद्धालुहरूको भीड देखिएको छ। दर्शन र पूजाका लागि टाढा–टाढाबाट भक्तजनहरू जनकपुर आइपुगेका छन्।

सुरक्षा व्यवस्था मजबुत पारिएको जनाउँदै जनकपुर उपमहानगरपालिकाले दर्शन व्यवस्थित बनाउन स्थानीय स्वयंसेवकको समेत सहयोगमा व्यवस्था मिलाइएको जानकारी दिएको छ।

श्रावण महिनाभर सोमबारका दिन यस्तै श्रद्धा र भक्ति भावका साथ शिव पूजामा सहभागी हुने परम्परा रहिआएको छ।