जनकपुरधाम, माघ १ ।नेपालभर आज माघे संक्रान्ति (तिला संक्रान्ति) पर्व श्रद्धा र उल्लासका साथ मनाइँदैछ। सूर्य धनु राशिबाट मकर राशिमा प्रवेश गर्ने अवसरमा देशभरका नदी, कुण्ड र पोखरीहरूमा स्नान गर्ने श्रद्धालुहरूको बिहानैदेखि भीड लागेको छ।

मधेश प्रदेशमा यस पर्वलाई ‘तिला संक्रान्ति’ का रूपमा मनाउने गरिन्छ। विशेषगरी जनकपुरधामका धार्मिक तथा ऐतिहासिक महत्व बोकेका गंगासागर, धनुषसागर र अंरगजाजसर पोखरीहरूमा श्रद्धालुहरूको उल्लेखनीय उपस्थिति देखिएको छ। श्रद्धालुहरूले पवित्र स्नान गरी तिल, च्युरा र सक्खर दान गरेका छन्।

माघे संक्रान्तिका अवसरमा मधेशमा खिचडी तथा तिलको लड्डु (तिलवा) खाने चलन रहेको छ। थारु समुदायले यस दिनलाई ‘माघी’ पर्वका रूपमा नयाँ वर्षको सुरुवात मानेर मनाउँदैछन् भने पहाडी समुदायमा घिउ, चाकु, तरुल र खिचडी खाने परम्परा छ।

जनकपुरका पवित्र पोखरीमा स्नान गर्नाले पाप नाश हुने र पुण्य प्राप्त हुने धार्मिक विश्वास रहिआएको छ। पर्वका कारण जनकपुरधामसहित तराई क्षेत्रको जनजीवन उत्सवमय बनेको छ।