काठमाडौं, २५ चैत । प्रधानमन्त्री बालेन्द्र शाह ‘बालेन’ले कूटनीतिक भेटघाटमा नयाँ अभ्यास सुरु गरेका छन्। पद सम्हालेको १० दिनपछि आज उनले नेपालस्थित विभिन्न देशका राजदूतहरूलाई एकैसाथ भेट्ने कार्यक्रम तय गरेका छन्।

 

परराष्ट्रमन्त्री शिशिर खनालको उपस्थितिमा हुने उक्त सामूहिक भेटले वर्षौँदेखि चल्दै आएको पुरानो कूटनीतिक चलनलाई तोडेको छ। सामान्यतया नयाँ प्रधानमन्त्री नियुक्त भएपछि नेपालस्थित राजदूतहरूले पालैपालो छुट्टाछुट्टै भेटघाट गर्ने प्रचलन रहँदै आएको थियो।

 

तर प्रधानमन्त्री शाहले सुरुवातमै सबै राजदूतलाई एकैसाथ भेट्ने निर्णय गरेर कूटनीतिक संवादलाई थप पारदर्शी, व्यवस्थित र प्रभावकारी बनाउने प्रयास गरेका छन्।

 

सरकारका अनुसार यो अभ्यासले समयको बचत मात्र नभई सबै देशप्रति समान व्यवहार गर्ने नेपालको कूटनीतिक नीतिलाई पनि स्पष्ट रूपमा प्रस्तुत गरेको छ। कुनै एक देशलाई बढी र अर्कोलाई कम प्राथमिकता दिने धारणा हटाउँदै सबैसँग एकैसाथ संवाद गर्ने प्रयास गरिएको जनाइएको छ।

 

सामूहिक भेटघाटमार्फत खुला र पारदर्शी छलफललाई प्राथमिकता दिँदै प्रधानमन्त्री शाहले कूटनीतिक सम्बन्धमा नयाँ शैलीको सुरुवात गरेका हुन्। यसलाई बालेन नेतृत्वको सरकार पुरानो ढर्राभन्दा फरक सोच र अभ्यासका साथ अघि बढ्न खोजेको संकेतका रूपमा हेरिएको छ।