मो. इर्शाद , जलेश्वर : मटिहानी, महोत्तरीको मटिहानीमा टोल विकास संस्थाहरूको प्रभावकारिता बढाउने उद्देश्यका साथ एक विशेष अभिमुखीकरण कार्यक्रम सम्पन्न भएको छ । ‘शान्त र समावेशी समुदायका लागि सशक्तीकरण’ भन्ने मुख्य नाराका साथ आयोजित उक्त कार्यक्रमले स्थानीय विकासमा नागरिक सहभागितालाई जोड दिएको छ ।
मटिहानीस्थित श्री राम माध्यमिक विद्यालयको सभाहलमा आयोजित कार्यक्रममा नवगठित तीनवटा टोल विकास संस्थाका पदाधिकारीहरूको सहभागिता रहेको थियो ।
कार्यक्रममा मटिहानी नगरपालिकाका विभिन्न वडाका पदाधिकारीहरूको उपस्थिति थियो:
कार्यक्रममा सहभागी तीनवटा टोल विकास संस्थाहरू यस प्रकार छन् : डिहिबार टोल विकास संस्था (वडा नं. ९, बहुअर्वा टोल)
बरदाहा टोल विकास संस्था (वडा नं. २, बरदाहा टोल)
भगवती टोल विकास संस्था (वडा नं. ६, भगवती टोल)
सपोर्ट नेपाल (SUPPORT NEPAL) को आयोजना तथा KURVE Wustrow को सहयोगमा सञ्चालन भएको यस कार्यक्रमको मुख्य उद्देश्य नवगठित संस्थाहरूलाई संस्थागत रूपमा बलियो बनाउनु रहेको थियो । कार्यक्रममा ४० जना पदाधिकारीहरूलाई संस्था सञ्चालन गर्ने कानुनी प्रक्रिया, योजना तर्जुमा गर्ने विधि र स्थानीय विकासमा टोल विकास संस्थाको भूमिकाका बारेमा विस्तृत प्रशिक्षण दिइएको थियो ।
कार्यक्रममा सपोर्ट नेपालका सल्लाहकार रोशना खड्का, धनुषा संयोजक शत्रुधन महतो र महोत्तरी संयोजक प्रकाश ठाकुर लगायतको उपस्थिति रहेको थियो । उपस्थित वक्ताहरूले टोल स्तरबाटै विकासका योजनाहरू छनोट गरी कार्यान्वयनमा लैजान सके मात्र वास्तविक रूपमा समुदायको सशक्तीकरण हुने धारणा व्यक्त गर्नुभयो ।
स्थानीय स्तरमा सुशासन र विकासका लागि टोल विकास संस्थाहरूको भूमिका महत्वपूर्ण हुने विश्वासका साथ कार्यक्रम समापन गरिएको थियो ।
यो खबर पढेर तपाईलाई कस्तो महसुस भयो ?
